 |
Iceland Worldwide |
|
|
|
Regions |
|
|
|
Wildlife |
|
|
|
Information |
|
|
|
|
|
|
|
 Snæfellsjökull National Park area |
|
 Þjóðgarðurinn Snæfellsjökull var stofnaður 28. júní 2001. Hann nær frá Gjafavík í landi Dagverðarár og fylgir jaðri Háahrauns upp að jökli. Mörkin liggja með jaðri jökulsins að austan norður fyrir Geldingafell og vestur að mörkum Gufuskálalands og fylgja austurmörkum þess til sjávar. Þjóðgarðurinn er tæpir 17 hektarar að stærð. Náttúruvernd ríkisins fer með stjórn þjóðgarðsins og ræður þjóðgarðsvörð sem skal sjá um daglegan rekstur hans samkvæmt verndaráætlun og samþykktu skipulagi. Fyrsti þjóðgarðavörður var ráðinn Guðbjörg Gunnarsdóttir.
 Þeir staðir á Snæfellsnesi sem hingað til hafa dregið til sín hvað flesta ferðamenn eru utan marka þjóðgarðsins. Þar má nefna Búðir, Arnarstapa og Hellnar. Á Búðum hefur verið rekið vinsælt hótel enda staðurinn umkringdur náttúruperlum. Búðahraun er friðland en hraunið hefur runnið úr Búðakletti, lágum gjallgíg í miðju hrauninu. Hraunið er víða úfið en þar þrífst fjölbreyttur gróður, sérstaklega burknagróður. Búðahellir er vestan Búðakletts og tengjast honum ýmsar sagnir. Margt er að sjá á Búðum og í næsta nágrenni. Þar er lítil falleg kirkja sem á sér sögu aftur til um 1700 en hefur verið endurbyggð nokkrum sinnum. Búðaós er rétt við hótelið og eim mesta skeljasandsfjara á Íslandi.
 Arnarstapi er vestan Breiðuvíkur og hefur þar verið stunduð útgerð enda ágæt smábátahöfn. Þar er líka fiskverkun og ferðaþjónusta hefur verið vaxandi á seinni tímum. Yfir Arnarstapa gnæfir Stapafell en þar mun Bárður Snæfellsás hafa búið í Sönghelli norðan í fellinu. Minnisvarði einn mikill, hlaðinn úr steinum af Ragnari Kjartanssyni, er á Miðmundarhóli. Heitir hann Bárður Snæfellsás. Fyrrum var Arnarsstapi einn af stöðvum einokunarverslunarinnar hér á landi og lengi bjó þar mun fleira fólk en nú. Höfuðeinkenni Arnarstapa er þó ströndin og klettarnir meðfram henni. Sjávargangur hefur þar mótað hringlaga víkur eða gjár inn í klettana. Þær heita Hundagjá, Miðgjá og Músargjá. Sérkennilegur klettur með gati, Gatklettur er við ströndina og einnig margir formfagrir drangar og aðrar slíkar náttúrusmíðar. Fuglalíf er mikið í klettunum og Ritan hvað mest áberandi en innan við klettaströndina morar all í Kríum.
 Hellnar voru fyrrum ein helsta verstöð á Snæfellsnesi og oft var þar fjölmennt enda gott lægi fyrir báta í víkinni. Þar er gamall hafnargarður en útgerð er að mestu aflögð. Ferðaþjónusta hefur byggst upp á Hellnum enda aðstæður hinar ákjósanlegustu og náttúrufegurð einstök. Frábær gönguleið er með ströndinni á milli Arnarstapa og Hellna og í víkinni eru sérkennilegar og fagrar klettamyndanir. Þar er einnig hellir í Valasnös sem heitir Baðstofa. Á síðustu árum hefur komið saman á Hellnum fólk sem lagt hefur stund á mannrækt og þar eru haldnar samkomur á sumrin. Margir trúa að frá jöklinum stafi yfirnáttúrulegur kraftur og vilja sækja sér kraft í jökulinn. Ekki minni menn en Halldór Laxnes og Jules Verne hafa sótt sér efnivið í bækur sínar í þessa trú fólks og kyngimagn jökulsins. Kirkja er á Hellnum.
 Innan marka þjóðgarðsins eru margir merkir staðir. Einna þekkstastir þeirra eru Djúpalónssandur, Dritvík, Þúfubjarg, Lóndrangar og Svörtuloft svo eitthvað sé nefnt. Djúpalónssandur er allstór grunn sandvík milli Einarslóns og Dritvíkur. Allstór sandfjara er inn af botni víkurinnar og lítið lón þar inn af. Einnig eru fallegar hraunmyndanir fyrir botni víkurinnar t.d. Draugahellir og Gatklettur. Undir klettunum eru nokkrir steinar sem notaðir voru sem mælikvarði á karlmensku vermanna.  Aflraunasteinarnir heita, Fullsterkur (154 kg), Hálfsterkur (100 kg), Hálfdrættingur (54 kg) og Amlóði (23 kg). Koma þurfti Hálfdrættingi upp á mjaðmarháan stall við steinana til að vera skipgengur í Dritvík. Dritvík er lítil vík girt hraunjöðrum nokkru fyrir utan Djúpalónssand. Er um 15 mínútna gangur þangað yfir Suðurbarða eftir Vatnsstíg sem var notaður til vatnsburðar af Dritvíkingum. Í Dritvík var öldum saman stór verstöð, ein sú stærsta og fengsælasta á Íslandi. Réru þaðan allt að 70 bátar með 300-400 vermönnum þegar best lét. Lítið sést nú af ummerkjum um sjávarsókn utan nokkurra fiskgarða. Sandurinn í Dritvík heitir Maríusandur og eru þar tveir klettar, Bárðartrúss og Bárðarskip, sem draga nafn af Bárði Snæfellsás.
Lóndrangar og Þúfubjarg
 Lóndrangar eru tveir klettadrangar nokkru vestan við Hellna en þar á milli er Þúfubjarg. Hægt er að komast að dröngunum frá Malarrifi en einnig er stuttur gangur bæði frá veginum og Þúfubjargi, 10-15 mínútur. Drangarnir eru líklega gígtappi eldstöðvar en sjórinn hefur sorfið burt mest af eldvarpinu. Sá hærri er 75 metrar og heitir Kristnidrangur en Heiðnidrangur er 61 metrar. Þúfubjarg austan Lóndranga er sennilega austurhluti eldvarpsins og hefur orðið til við gos í sjó. Það er rétt við þjóðveginn og er m.a frægt fyrir að Kolbeinn jöklaskáld háði þar kvæðaeinvígi við Kölska. Kolbeinn vann þegar Kölski gat ekki botnað þessa vísu:
Horfðu í þessa egg, egg,
undir þetta tungl, tungl.
Steypi ég þér með legg, legg,
lið sem hrærir úln. úln. |
Þúfubjarg er annars gott fuglabjarg, hentugt til fuglaskoðunnar. Milli þess og þjóðvegarins er grasivaxinn hóll, Svalþúfa, sem talinn er vera álfabústaður. Útræði mun hafa verið úr Drangsvík austan drangana og bera rústir sjóbúða og fiskigarða í hrauninu því vitni. Talið er að róið hafi verið á allt að 12 bátum, þegar flest var en ekki var lendingin góð. Á Malarrifi var líka mikið útræði öldum saman, eða fram til aldamóta 1900, og má þar glöggt sjá þess merki. Lendingin var lítið betri en við Lóndranga. Viti var byggður á Malarrifi 1917 en 1946 var hann endurbyggður.
 Snæfellsjökull (1446m), sem er innan þjóðgarðsmarkana, gnæfir yfir ysta hluta Snæfellsness. Hann er fagurmótaður jökull sem hvílir á eldkeilu sem gaus síðast þeytigosi fyrir um 1700 árum. Jökullinn er um 10 km² en hefur minnkað um meira en helming frá aldamótum 1900. Toppgígur hans sem hulinn er jökli er um 200 metra djúp. Á toppi jökulsins rísa hæst þrír tindar, svokallaðar Jökulþúfur og er útsýni frábært yfir allt Snæfellsnes og þjóðgarðinn. Auðvelt er að fara á jökulinn en talsvert er um sprungur í hlíðum hans og því varasamt nema eftir kunnum leiðum. Best er að leggja á jökulinn af Jökulhálsi og eru skipulagðar snjósleða- og snjóbílaferðir á jökulinn af ferðaþjónustuaðilum á svæðinu. Hraun sem runnið hafa í gosum úr Snæfellsjökli prýða hlíðar hans sérstaklega að sunnanverðu og liggja sum í sjó fram. Allmörg eldvörp eru einnig í kringum jökulinn Purkhólar, Hólahólar og Öndverðaneshólar þar á meðal. |
|
|
|
|
|
Home
